Ævintýri undir brú..........
Einn af fyrstu gestum Fiskifélagsins ýtti frá sér tómum diskinum þar sem hann sat á útisvæðinu og sagði: „Það bregst ekki, öll bestu ævintýrin gerast undir brúm.“ Við fengum snarlega samþykki fyrir því að nota þetta sem slagorð.
 
Það er ekki nóg með að matseðillinn sé ævintýri sem ber þig umhverfis hnöttinn, heldur er umgjörð staðarins og samsetning hreinræktað ævintýri. Zimsen-húsið var byggt 1884 og tvöfaldað að stærð 1889 á lóð númer 21 við Hafnarstræti. 2006 var Zimsen húsið tekið af grunni sínum og flutt út á Granda þar sem það var gert upp af alúð og natni eins og sjá má.
 
Við undirbúning Grófartorgs fannst gamli hafnarbakkinn frá 1850 sem nú hefur verið endurgerður sem listaverkið „Flóð og fjara“ af Hjörleifi Stefánssyni og Minjavernd og gefur útisvæðinu einstakt yfirbragð. Þar hækkar og lækkar í líkt og við nýju höfnina. Þegar þessi góði grunnur hafði verið lagður var svo tími til komin að sækja húsið út á granda og tilla því eins og kórónu ofan á nýformað Grófartorg.
 
Hönnun staðarins var í höndum Leifs Welding og matreiðslumeistarans Lárusar Gunnars Jónassonar. Það er ríkt í matreiðslumönnum að blanda saman ólíkum
hlutum og snilld Leifs sést í því hve vel þeim tókst að mynda spennandi heild. Bak við barinn hafa gluggar úr Fríkirkjunni í Hafnarfirði frá 1913 fengið nýtt hlutverk og baklýstir gefa þeir staðnum ævintýrablæ. GÁ húsgögn smíðuðu bása í innri sal en stólarnir koma frá Tom Dixon. Maturinn er svo borinn fram á diskum frá Figgijo í Noregi, voru skreyttir og hannaðir sérstaklega í samvinnu við matreiðslumenn Fiskfélagsins en fengu svo góð viðbrögð að þeir eru væntanlegir á markað um heim allan. Í fremri sal eru til sýnis og sölu margt skemmtilegra muna sambærilegum þeim sem við notum í eldhúsi og sal.
 
Við tökum brosandi á móti þér og leiðum þig í gegnum heimshornaflakk bragðlaukanna sem byrjar líkt og í bestu ævintýrum undir brú.
Sjáumst!